هاروت وماروت
" هاروت وماروت " الإسمين دول مرتبطين ب معاني مرعبة كثيرة جدًا وأكيد سمعت عنهم قبل كده سواء ف القرآن الكريم أو ف روايات الرعب وغيره من كتب التُراث السحيقة ولكن إيه الحقيقة وراهم، هل هما ملكين فعلًا ولا حاجة أخطر من كده؟!!
قبل منتكلم عن أشهر ثنائي في التاريخ خلينا الأول نأخد نبذة بسيطة عن حضارة " بابل " الحضارة اللي وبسببها الإسمين دول ظهروا وتم إرسالهم من الله ل تعليم هؤلاء القوم السحر!!
ظهرت حضارة " بابل " في الألفية الثانية ما قبل الميلاد في بلاد ما بين النهرين بالعراق، تم فتحها بعد حروب عديدة سواء في الجنوب أو الشمال واشتهرت بموقع متميز جدًا وسط بلاد عديدة في الفترة دي وده خلَّاها متميزة جدًا تجاريًا لأقصى حد بالإضافة لكده امتاز أهلها بمقدرة عظيمة في العمل والعلم سواء الفلك، الطب والبناء بالطبع، عشان كده نقدر نقول أنَّهم كانوا المنافس الحقيقي للحضارة المصرية القديمة، إسم " بابل " باللغة الأكادية تعني بوابة الله أي جنة الأرض...
ولكن دوام الحال من المُحال، اخترق السحر بابل وتوغل بها بصورة غير مشهودة قادمًا من بلاد فارس بس لما دخل السحر أرضهم كان عشوائي مُضطرب ملهوش أهمية لحد ما بدأ أهل العلم والقوى يدرسوه ومش بس كده ده حاكمهم الأكبر كمان عقد أول إتفاق تحضير في تاريخ البشرية وهنا كانت المصيبة، استغل الجان والشياطين ده وابتدوا الترويج فأن سيدنا سُليمان نبي الله كان ساحر وبالطبع النفس البشرية يسهل خداعها عشان يآمن أهل بابل بكده بل ويستزيدوا فيه ف يحققوا طفرات غير مسبوقة لدرجة أنهم عملوا قوانين للطلاسم، الهياكل والطقوس وكمان توصلوا ل درجات مُعينة من السحر هي الأ قوى زي " السحر النجمي " واللي ساعدهم على كده علمهم الكبير ب الفلك وفالوقت ده وبسبب تفشي السحر وصل الأمر لأن الشياطين كانت بتتحول إلى بشر وبيتعايشوا مع أهل بابل على نفس الأرض بصورة طبيعية لحد منتهت ب مرحلة مُرعبة وهي أنَّهم كانوا بيسيروا ف الطرقات جمب بعض الجان والبشر!!!
هنا كان لازم يبقى فيه تدخل والمرة دي التدخل كان إلهي من المولى ونبدأ بالآية الكريمة اللي بيقول فيها الله عز وجل:
" وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ ۖ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ ۚ وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ "
التفسير الشائع للآية كان واضح ألا وهو أن سيدنا سليمان لم يك.فر بل الشياطين زورت ده وأن ربنا أنزل ملكين " هاروت وماروت " ب بابل عشان يعلموا الناس السحر بس بيقوللهم نحن فتنة فلا تك.فر والمعظم عارف التفسير ده واللي فيه أن الملكين استوطنوا بيت كبير، وبعد ما أظهروا قوى كبيرة جدا بدأت الناس تروحلهم عشان يعرفوا إيه نوع السحر اللي بيستخدموه أو هل بيمتلكوا طلاسم جديدة لا علم لهم بها وفعلا شاع صيتهم ف كل مكان بل وقصدهم ناس من برا بابل نفسها عشان يتعلموا منها كيفية تنفيذ السحر ب كامل طرقه وأثناء كده وهما بيعلموا الناس كانوا بيأكدوا أن دي أعمال غير صحيحة وفتنة كبرى يجب الحذر منها...
بس هل الأمر فعلًا بالبساطة دي؟!!
عارف بن كثير؟ أهه الراجل العلَّامة ده ف تفاسير القرآن ذكر كلام مهم جدًا بخصوص الآية دي لازم نفهمه كويس وأوله أن كلمة " ما " هنا نافية مش وصل، يعني " ما " بتنفي نزول السحر على الملكين مش بتوصل اللي حصل ف بابل،
طيب وده يودينا ل فين أو يثبت إيه؟!!
تعالى أقولك قصة صغيرة قبل مشرحلك التفسير الصادم، أيام الرسول صلى الله عليه وسلم زعم اليه,,,ود كُ.فر سيدنا سليمان وأنه كان بيتلقن السحر على يد جبريل وميكائيل ملكين من الله عز وجل وهنا مربط الفرس...
تفسير الآية و " ما " النافية كانت اسقاط على نفس ذلك الزعم منهم والملكين فالآية يعودان على " جبريل وميكائيل " لأنهم وبالطبع لم يعلموا سيدنا سليمان أي سحر، وبداية حدث جديد كان بإسمين " هاروت وماروت ".
لو التفسير كده أومال " هاروت وماروت " يبقوا مين؟!!!
اختلف العلماء هنا بقى ففيه منهم قال أنهم برضو ملكين وكانوا بيعلموا الناس السحر عشان يفرقوا بين نبوة سيدنا سليمان والسحر الحقيقي ويعرفوا أن الطلاسم اللي بتبدأ بإسم نبي الله فهي جائرة وفقط لإثبات كذب هؤلاء القوم وطبعًا بيقولوا أنهم فتنة..
عُلماء آخرين كان ليهم رأي مختلف تمامًا وقالوا سبق وتحولت الجان والشياطين إلى بشر نعم وكذلك الملائكة زي محصل مع سيدنا محمد، إبراهيم ولوط، والتفسير بيقول أن " هاروت وماروت " هنا عطف على الشياطين أو الجان أو ممكن يكونوا إنس بس متعلمين للسحر بشكل غير مسبوق، واستدلوا برضو على ده بأن السحرة من أساليبهم لإغوائك أنهم يُبينوا كونهم رجالًا صالحين ويتلوا كمان قدامك قرآن وآيات منه ومستحيل ساحر ييجي يقولك هعالجك ب خدمة من الجن مرة واحدة كده لازم يفرش نفسه الأول ويسيطر عليك أو يخدعك والتفسير هنا بيقول نفس القصة، أن هاروت وماروت كانوا بيعلموا الناس السحر وما يفرقون به بين المرء وزوجه وجميع الأساليب بس فالآخر يقولوا هذه فتنة فلا تكفر فطبيعي انت هتبطل بس تخيل أن اديتك علم زي ده وبقيت قادر فأي لحظة تعمل طلسم تحضر به جان يأهلك لامتلاك قوى عظيمة وجات بعدها لحظات غضب عليك لأي سبب ف طبيعي وقتها هتروح وفورًا تعمله وتبقى دخلت ف لعبة مُهيأة وباحترافية للوقوع ف الشرك.
ممكن نختلف ف هل " هاروت وماروت " كانوا فعلًا صالحين أو فاس..دين بس هل فعلا لم يكونوا ملكين وأن الآية الكريمة نزلت دفاعًا عن ملكين الله " جبريل وميكائيل " وقتما افترى عليهم ي..هو..د يثرب.
تخيل بقى أن فيه تفسير ثالث من بني إس...را..ئيل نفسهم وتم الترويج ليه ب كثرة ف روايات وكتب شهيرة وبيقولوا فيه أن هاروت وماروت كانوا ملكين فعلًا بس بسبب احتجاجهم على البشر وأنهم أفضل ربنا نفاهم إلى الأرض وتشكلوا بصورة بشرية وقصدوا بابل بأمر من الله وبدأوا يُعلموا الناس السحر ويقولوا أنهم فتنة بس القصة المُريبة واللي للآسف اتذكرت ف كتب كثيرة وهي افتراء، أن فيه سيدة غاية فالجمال عرفت تنتقل إلى مخبأهم وفتنتهم لهدف مهم وهو الوصول إلى أسباب السماء ونجحت فده فعلًا وبعدها صعدت للسماء لكن الله عاقبها وتحولت لكوكب الزهرة!!! اللي كلنا عارفينه حاليًا وتم عقاب الملكين بالمكوث في بابل، لا وكمان فيه جزأ فرعي أنها كانت بتأمرهم بأوامر وكانوا بيرفضوا لخوفهم من الله لكنها قدرت تسقيهم الخمر وبعد ما فاقوا قالتلهم أنهم نفذوا كل أوامرها!! وطبعًا قصة زي دي باطلة وللآسف بنقع فيها وبنتلوها كأنَّها حقيقة ثابتة... والناس بتصدق وبعد الشد والجذب بتفضل عالقة في الأذهان.
" هاروت وماروت " منكرش أنهم لغز كبير جدًا بس مهمتي أني أفتح عينكم على الحقيقة أو رُبَّما أجزاء منها وواجب تدوروا وتشوفوا إيه الأقرب إلى القلب والعقل وبالنسبالي وزي ما ذكرت شايف التفسير الخاص بأن الملكين عائدة على " جبريل وميكائيل " هو الأصح خصيصًا أنَّها متناسقة مع وقت نزول الآية وأن الإسمين دول كناية عن قوى شيطانية أو بشرية طاغية!!
أخيرًا فيه حاجات كتير مُرعبة ف بابل وكتب زي التلموذ والزهوار وهو الكتاب البابلي الأشهر بمعنى الضياء أو النور وطبعًا حاضرة بابل نفسها هيكون لينا نصيب بإذن الله من الحديث عنها ف وقتٍ لاحق بس المهم تعرفوا أنَّها حضارة مليئة بالأسرار والقرآن أعمق بكثير ممَّا نتصور وسواء اتفقت أو اختلفت على كونهم ملكين يهمنا بس نعرف أن السحر كُ...فر بالله عز وجل وأى إدراج لمُسمى الله أو أسمائه الحُسنى في بدع مع طلاسم روحانية فده جزء من الخطة ف احذروا من السحرة المُخادعين...
بقلم /محمد ناصر
فريق تاريخ وآثار
